Na sajun a pé zot y les leziuns da imparé

En valgünes zifres por scumencé: 7 dis de festa él danter Nadé y Santa Guania, ideal por jí cun i schi sön les pistes de Südtirol. Te nosta provinzia él indöt 340 implanc portamunt por i schiadus. Intratan la sajun da d’isté porta chisc 8 miliuns de porsones sö alalt, ti mëisc da d’invern passa 128 miliuns de porsones – na desfarënzia daspavënt grana. Le tëmp da Nadé é por le turism dai schi chël plö important: te chëstes döes edemes vëgnel realisé en ütl de cuaji le 20 porcënt. Chësc vel sambëgn ince por i hotí y la gastronomia. Y por döt chël che roda incër ía, dales butëghes ai bars, dai maestri de schi ai fornidus, dal imprëst dai schi ales üties da munt y i.i.

A arferé i afars chësc iade – sciöche savun – él la pandemia gaujada dala Covid-19. Ince sce i numeri dles porsones infetades dal virus é tl jí jöpert bel plan, i tröc schiadus che ruvass te nostes muntes sce i lifc dauriss, podess implí y fa colasé i ospedai. Propi a chësta moda ó Roma vieté les vacanzes cun i schi – almanco cina ai 7 de jenà dl 2021.

Impó podessel gní a s’l dé na daurida danfora te Südtirol, forsc bele dan Nadé y mâ por chi dl post. De ofizial n’él nia. An mëss odëi sciöche les zifres dl coronavirus jará. “La speranza é l’ultima a murì”, dij ince le presidënt de Dolomiti Superski Andy Varallo. Che sotrissëia: “Sperun tres ciamó da podëi pié ia ai 18 de dezëmber, ince sce ara sará döra”. De ofizial, intratan, él che por i sciori sarál imposcibl ruvé tles Dolomites, él pö odü dant na proibiziun a livel talian da se sposté danter les regiuns dai 21 de dezëmber cina ai 6 de jenà; ai 25 y 26 de dezëmber y ai 1° de jenà ne sarál gnanca poscibl jí da n comun al ater.

Tröc ne capësc nia a ci moda che le govern Conte sides tan de cuntra le jí cun i schi. Forsc ajache le premier n’è nia “n bun schiadù” y “n’à mai aldí baian dl jí cun les ciaspes” – sciöche revelé dala senaturia dla Svp a Roma Julia Unterberger te na intervista tl radio. Mai tan co chëstes edemes él gnü dramé jö le turism da d’invern, ince sce tl 2019 al fat fora n bilanz de 10 miliarc de euro; chël previjonal é de feter 3 miliarc cun en manco 70% de faturat. Le turism dai schi á na cuota de zirca le 11% dl pil turistich nazional, che oress dí le 1 porcënt dl pil complessif dla Talia.

Intratan fejun nëi artifiziala: tl’Alta Badia, te Fascia, sön Plan de Corones; i lauranti dles assoziaziuns turistiches abelësc i paisc cun decoraziuns da Nadé – por dé almanco en pü’ de otimism y atmosfera te chisc tëmps de malsügherté. La trica amesa i operadus turistics é grana. Ince sce la sajun podess piè ìa regolarmënter da mez jenà, la pordüda sarà stada enorma y por düc. Furà, merz y chëles döes edemes de aurì ne impliarà gnanca les casses.

Na cossa é sigüda bele sëgn: le Nadé 2020 sará atramënter. Forsc le pröm en assolut che i operadus turistics passará te familia (y nia te hotel o cun i gesc). Che nia döt é dé por sigü y che al é debojëgn da se fá val’ pinsier söl turism en general (sostenibilité impede massa, segurëza impede risch) é n atra leziun che düc pó imparé – ince en vijiun dl proscim isté, dl invern 2021/22 y di agn che gnará. Le prigo indere é che – passada la pandemia  – döt vais zoruch a dan la pandemia; che al ne se müdes nia; che al vëgnes indô punsé mâ ai afars y a fá scioldi sciöche nia ne foss sté. Y chësc cheder fossel dërt evité.

Scrite ite tl canal Telegram!  👉🏻  https://t.me/altoadigeinnovazione

Sun ince sön Facebook 👉🏻  https://www.facebook.com/altoadigeinnovazione

Y Linkedin 👉🏻  https://www.linkedin.com/company/alto-adige-innovazione