Zënter scolastich a La Ila: aprovada la convenziun cun le Comun

FacebookTwitterLinkedInWhatsAppEmail

A La Ila gnará le zënter scolastich ressané. La Junta provinziala á sëgn aprové la convenziun cun le Comun de Badia por la costruziun. “Investimënc por la scora y investimënc por le dagní” dij i assessurs Alfreider y Bessone.

La reorganisaziun dl zënter scolastich da La Ila é oget de n stüde de fatabilité y sëgn ince de na convenziun cun le Comun de Badia che podará gní sotescrita, a inom dla Provinzia, dal assessur por le frabiché publich y le patrimone Massimo Bessone. Chësc dess gní a se le dé tl mëis de dezëmber dl 2020. La convenziun, che é gnüda aprovada sëgn dala Junta provinziala, definësc les competënzes desvalies tla gestiun dles fases de proietaziun y de laur. Plü avisa: ti surandá la Provinzia de Balsan al Comun de Badia les prestaziuns tecniches tla fasa de proietaziun y tla fasa d’esecuziun sciöche ince i laurs. Le Comun se surantol a so inom y por cunt dla Provinzia la funziun de responsabl dl prozedimënt, ince sce la supervijiun é de competënza provinziala.

Investimënt de feter 16 miliuns de euro

L’intervënt de reorganisaziun dl zënter dles scores tol ite, por la pert che é de competënza dla Provinzia, l’ampliamënt dla scora alta (l’Istitut tecnich-comerzial y le Lizeum linguistich) y la realisaziun de na scora de musiga nöia y dl apartamënt por le vardian dla scora canche al vëgn fat sö danü la scora mesana “Tita Alton”, che é de competënza dl Comun de Badia. Döt l’investimënt amunta a 15,8 miliuns de euro; le proiet vëgn finanzié dala Provinzia cun passa 10,4 miliuns; chësta spëisa é bele gnüda metüda tl program trienal 2019/2021. Sce döt vá aladô dl program spo messess la proietaziun gní surandada de ma dl 2021, le proiet de fatibilité tecnica y economica messess gní fat cina de novëmber dl 2021 y le proiet definitif cina d’aurí dl 2022. Le proiet esecutif dess gní arjigné ca cina d’agost dl 2022. I laurs dess gní surandá de forá dl 2023 y ai podará spo scomencé de merz dl 2023.

“N post d’incuntada important por i studënc y les studëntes”

I á porté inant cun impëgn le finanziamënt por le proiet dl zënter scolastich da La Ila, ajache la Val Badia n’á nia ma debojëgn de scores modernes, funzionales y sigüdes, mo ince da mantigní vis i valurs, les tradiziuns y dantadöt la cultura ladina. Vigni scioldo dé fora por la comunité ladina é n bun investimënt” dij Massimo Bessone, assessur provinzial por le frabiché publich y le patrimone. L’assessur por la scora y la cultura ladina Daniel Alfreider dij che “le zënter scolastich nü da La Ila sará n post d’incuntada important por i studënc y les studëntes, na garanzia por nosta jonëza y por i posć de laur tla valada, al pitará lercs modernes de condivijiun, olache ince faturs sciöche l’alimentaziun sana, le sport y n’acustica moderna garantiará de buniscimes prospetives de svilup. Ara se trata de n’opera che aumënta l’atrativité y la cualité dla vita de döta la Val Badia”.

I detais dl proiet de reorganisaziun

Le ressanamënt dla scora mesana “Tita Alton” é de competënza dl Comun de Badia.

Por la scora alta (l’Istitut tecnich-comerzial y le Lizeum linguistich) vëgnel preodü l’ampliamënt dl’alzada sotletët, l’alzamënt de na pert dl frabicat sciöche ince le ressanamënt energetich dles perts che resta. La Scora mesana “Tita Alton” gnará trata jö y fata sö danü cun n ampliamënt dl’ara a nord dl frabicat, tles perts che resta gnarál fat danü le tët, trat fora y fat ite danü i func. Tl cheder dla reorganisaziun dla scora mesana vëgnel ince odü danfora la realisaziun de na sënta nöia por la scora de musiga y la colocaziun nöia dl apartamënt dl vardian. L’intervënt tol ite na spersa de indöt passa 9.200 metri cuadrac.

Scrite ite tl canal Telegram!  👉🏻  https://t.me/altoadigeinnovazione

Sun ince sön Facebook 👉🏻  https://www.facebook.com/altoadigeinnovazione

Y Linkedin 👉🏻  https://www.linkedin.com/company/alto-adige-innovazione

Ti potrebbe interessare