L’Or brüm dles Ganes ala concuista di Paisc Todësc
Tosc sarál dan man le album numer 5 dl trio pop ladin Ganes de Elisabeth y Marlene Schuen cun Maria Moling. “Tartaruga de plastica” é le titul chirì fora por öna dles ciantes che vá plö a orëdla. Le tour dles trëi badiotes cun “Or brüm” pëia ia dai Paisc Todësc, olache les ciantarines á (dër) n gran suzes.
“Aste odü, ai s’un é bele jüs, á pochené döt y demez. La vijina á n bichini nü, de n corú ‘corallo’ che me sá bel. I ó jí al mer, a me apraté la cern y la tartaruga de plastica m’un frega”. Insciö fej le test dla ciantia “Tartaruga de plastica”, le singul publiché da püch che gnará fora tl album “Or brüm” l’isté che vëgn. La bela aventöra dl grup Ganes á metü man dan diesc agn. Al fô le 2010 canche les ciantaries publicâ le pröm album. Tröp s’á mudé te chisc agn. Mo impó: dô le album “An cunta che” dl 2016 – ispiré soradűt ales liëndes – eco dan man le laur nü. Y le tour. Che portará le trëi jones soradöt foradecà, ti Paisc Todësc.
Cinamai i dessëgns dla clip musicala “Tartaruga de plastica“ é gnűs realisá dales Ganes instësces.
“Tartaruga de plastica“ é na ciantia lisiera, che vá feter atira a orëdla. Le pinsier doía é indere scerio, vala pö dl problem dl refodam, dla plastica ti mers, dles particoles tl aria y tl ega. Le messaje dla band é tler: “Al é gran ora da fá val’, por ne ji nia en bel dé instësc sot tla plastica”. La tematica prinzipala dl album é liada ala natöra y ales figöres mistiches. Mo respet a denant, á les trëi badiotes chësc iade fat “dűt en ciasa”, zënza ji te n stűde aposta o da n produzënt. Dala registraziun ala produziun cina ai aranjamënc: pro “Tartaruga de plastica“ é cinamai le video fat te ciasa. “Un messű se studié fora döt y al n’é nia tres sté saurì” á dit Marlene Schuen dan da püch te na intervista. Ince i bì dessëgns dla clip musicala é gnűs realisá dales Ganes.
Tl album saral da ciafé le iodler “Rü dla Gana“, na ciantia tuta sö intratan le tëmp de lockdown. “Ince sce dűtes trëi fô te n post desfarënt, éla impó jűda da ‘cianté adűm’” – giulan a n laur de tai y cujì te post-produziun. Les Ganes – che plej dandadöt por le charme ladin y che cianta autenticamënter por ladin – sará ai 29 de setëmber a Zwickau (Sachsen). Spo vala inant cun conzerc dan a salfs plëgns de interessá y apascioná a Hamburg; Darmstadt; Stuttgart; Ulm; Ingolstadt y Landshut ti Paisc Todësc. Le calënder dl tour se destira fora cina mez dezëmber. Chiló la plata internet dles Ganes: ganes-music.com
Scrite ite tl canal Telegram! 👉🏻 https://t.me/altoadigeinnovazione
Sun ince sön Facebook 👉🏻 https://www.facebook.com/altoadigeinnovazione
Y Linkedin 👉🏻 https://www.linkedin.com/company/alto-adige-innovazione
