Indiscreziuns: eco la proposta de Junta dl ombolt Frenademetz
La pröma convocaziun dl consëi de Comun nü a Badia sará ai 6 de otober. Intratan á le ombolt Iaco Frenademetz fat i pröms inoms por la Junta. L’aprovaziun sará n compit nia saurì.
I numeri – al momënt – n’é nia dala pert de Iaco Frenademetz che – recordun – á ciafé 866 usc (le 43,4%). O, te atres parores: 25 usc demanco dl sfidant Manfred Canins. Cun süa lista “Manfred Canins Ombolt” á l’ex diretur dl Assoziaziun Turistica ciafé le 37,2% dles usc y bëgn 7 mandac te Consëi. “Badia – La Ila – San Ciascian” de Frenademetz á arjunt le 24,9% dles usc cun 4 mandac y la lista “Deburiada”, cun a cé Thomas Pescollderungg, 5 mandac. La sentada costituënta é söl program en mertesc ai 6 d’otober dales 9 da doman, tla Ciasa J.B. Runcher. Le punt plö important al ordin dl de: la confermaziun dl ombolt, la confermaziun di mëmbri dl Consëi y ince le joramënt da pert dl pröm zitadin.
Iaco Frenademetz, 72 agn: mët sö la Junta ne sará nia n compit scëmpl.
Mëter sö na Junta ne sará nia scëmpl, él pö na costelaziun dër particolara a Badia do les lites di 20 y 21 de setëmber ch’é stades dassën “combatüdes”. Impó ó Frenademetz, 72 agn, porvé ciafé la crëta por resté inant le pröm zitadin. Y insciö rodel bele les prömes usc por ci che reverda les propostes por la Junta. Y ciügn él pa chisc inoms? Pescollderungg Thomas da San Ciascian (lista Deburiada, 425 usc), l’assessur atual ai laurs publics; Dapoz Valentini Edit (vizeombolta atuala y assessuria al sozial y por les families, Lista Badia – La Ila – San Ciascian, 229 usc) Werner Pescosta de Badia (assessur atual, lista Deburiada, 335 usc); Pedevilla Christian da La Ila (avocat cun stüde a Bornech y candidat a ombolt por la Lista Zivica Por Düc, 288 usc); Mussner Elide da San Ciascian (159 usc).
Da sotrissé él che chësta é ma na proposta, che pó tosc ince mudé. Da odëi sarál ince le documënt programatich che Frenademetz presentará por i proscims cinch agn y sce tla lista dles operes da fá sarál da ciafé la tan debatüda zirconvalaziun a La Ila por desgropé le problem dl trafich: la lista de Pedevilla â proponü en tunel sot paisc; la lista de Canins s’â dit cuntra le proiet de n tunel deperpo che l’ombolt Frenademetz â alzé fora che “n tunel te süa legislatöra ne gnará nia realisé, ince sce al é dërt che an n’en vëgnes baié”. N ater tema ti programs de dütes cater les listes a Badia ê sté chël di jogn, plö avisa dl frabiché alisiré. Ince chiló, vignun cun n atra idea co l’afronté.
A chësta mansciun ciafes düc i resultac definitifs dles lites comunales 2020 a Badia.
