Alta Badia: co él pa jü (veramënter) l’isté? Eco i numeri

Lugio y agost n’é nia sta mëisc sauris. Por ostis, afitaciamenes y operadus dl setur turistich é stada la trica dassën grana do le lockdown y tl plëgn dl’emergënza sanitara. Mo impó: spezialmënter d’agost él rové adalerch en gröm de foresti, dandadüt dala Talia. De chësc se n’an intenü ince dal gran trafich söles strades y dales porciuns de jënt sö y jö por munt. Sëgn é i numeri definitifs dan man. Che á pa lauré bun? Che demanco? Y lapró: le diretur nü dl Alta Badia á finalmënter n inom.

Jügn: -78% de pernotamënc

Le turism s’â dër debité a chësc isté: al é sté da spavënt compliché programé danfora o cinamai fá val’ previjiun. Ti ciarun al andamënt turistich ti sis paisc dl Alta Badia, aladô dles statistiches che nes é gnüdes metüdes a desposiziun. Gnüda éla insciö. Cun en mëis de jügn – olache ciamó la maiorënza dles strotöres â stlüt – che á registré en manco 77,54% de sciori rová adalerch respet ala medema perioda dl 2019. Le dat: 6.448 “arrivi” dal 1° ai 31 de jügn 2020 cuntra i 28.705 dl ann denant. I pernotamënc: manco 78% (20.938) respet al jügn 2019 (olache al n’en fô feter 95.500).

Lugio: -24,7% de sciori

Tröc é sta i turisc – dantadöt dala Talia, mo ince da stac vijins – che é gnüs tl Alta Badia. La situaziun? ​Tl mëis de lugio él gnü compedé n numer de 50.000 sciori rová adalerch, respet ala medema perioda dl 2019 n manco dl 24,7 porcënt. Le numer de pernotamënc é ince jü jö dl 19,8 porcënt y é rové a 252.166. Chi che á patì le plö é stá i hoteliers (-25% de pernotamënc); i afitaciamenes (-35%); les üties da munt (-72%). En pü’ damì éla jüda por i residences (-3%); les “ciases-vacanzes” (+2%) y les “feries söl lüch da paur” (+18,5%).

Agost: le manco é ma pice

Tröc é sta i turisc che é gnüs d’agost tl Alta Badia.

Sce an ciara zoruch ê le isté 2019 sté “da récord”, cun aumënc por vigni assoziaziun turistica badiota. Y chësc 2020? Bun á lauré feter dütes le categories; le manco tl mëis de agost 2020 é sté ma pice. Tl detail: le numer de ghesć rová adalerch é de 71.150. Respet ala medema perioda dl 2019 n manco dl 3,7 porcënt (y cinamai en plö dl 0,5% respet al agost 2018). Le numer de pernotamënc: 408.663, che oress dì en manco dl 1,6 porcënt respet al agost dl ann passé. Mudé ne s’á gnanca le numer di dis (5,7) che le ghest resta en vacanza tl Alta Badia. Mo ciünes él pa les strotöres plö tocades dala crisa? Les ponsiuns (-13% de pernotamënc); i alberc (-28,5%); i afitaciamenes (-17,7%); i hotì (-3%).

Le cunt dl isté

En general pon dì che la sajun da d’isté n’é nia stada na “catastrofa”. Dal 1° jügn al 31 agost 2020 él gnü compedé n numer de 127.630 sciori rová adalerch tl Alta Badia, respet ala medema perioda dl 2019 n manco dl 24,5 porcënt. Le numer de pernotamënc é ince jü jö dl 17,4 porcënt y é rové a 681.767.

Le diretur nü á inom Max Nagler

Dan la sajun da d’isté â le “caje Bernardi” fat la roda di media. Recordun: le jonn da La Ila ne â nia respeté la carantena y dô le gran stöp mediatich êl gnü a s’l dé na fasa dër malsigüda y delicada tl Alta Badia. Sëgn, dô na seleziun lungia a chëla che al á partezipé deplö candidac – ëi y ëres, profescionisc badioc y da foredacá – á l’Assoziaziun turistica ciafé finalmënter n diretur nű por la direziun generala. Ala se trata de Max Nagler da La Val, stüdi ala Bocconi de Milan, che à albü esperiënzes a Tallin (Estonia); Minca (Paisc Tudësc); Barcelona y Malta. Y che da passa sis agn laora pro la m2 railgroup a Pidro sciöche “Marketing and Business Development Manager”. Les desfides sará granes y le laur ampl y zite.

Scrite ite tl canal Telegram!  👉🏻  https://t.me/altoadigeinnovazione

Sun ince sön Facebook 👉🏻  https://www.facebook.com/altoadigeinnovazione

Y Linkedin 👉🏻  https://www.linkedin.com/company/alto-adige-innovazione