Do le “caje Bernardi”: l’Alta Badia chir n diretur nű

Le caje á fat la roda di media nazionai y – forsc – él gnű esageré, sides a livel de ustaria che ince cun i comentars sön i social. Indere, sce an ciara sön strada chisc dis, y ales prenotaziuns por le mëis d’agost, spo pel che l’imaja dl Alta Badia ne ais nia patì demassa. An pò dì: le gran stöp mediatich s’á bel plan lascé jö. Y sëgn – gnanca n mëis do le fat – ò l’Assoziaziun turistica ciaré inant. Chisc dis él gnű publiché ti foliec na inserziun cun chëla che al vëgn chirì n diretur nű. Eco les condiziuns por se candidé.

Na porsona nöia por le post dirigenzial

Do la situaziun desplajora che gnüda a s’l dé a guaja dl “caje Bernardi” por la carantena nia respetada (recordun: le jonn da La Ila é sté dui iadi negatif y é endô lëde – mo zënza laur do avëi dé les dimisciuns) – y le gran debate a livel local che á cherié na fasa dër malsigüda y delicada tl Alta Badia – ò l’Assoziaziun turistica porvé da ji inant cun na porsona nöia por chësc post dirigenzial. Secundo les parores dl presidënt dl’ATAB, Oscar Alfreider, dan en valgűnes edemes ala Rai Ladinia, se augürun por le dagnì “n diretur cun esperiënza” che podess “ince gni da foradecà”. Intratan à l’ATAB publiché n inserat por chirì na porsona por l’inciaria de diretur por la sënta zentrala a La Ila. Sigű é bele sëgn che chësta porsona arà de gran desfides y le laur sarà ampl y zite.

Chësc è l’inserat: 

L’Assoziaziun Turistica Alta Badia chir

1 diretur/ia por la direziun generala dl’Assoziaziun Turistica Alta Badia

Pro les funziuns aldel:

– Aministraziun; coordinamënt di colaboradus cun organisaziun dles filiales; conduziun dles strotöres turistiches; tigní vis i contac cun i mëmbri y les

istituziuns publiches sciöche uniuns locales; organisaziun de manifestaziun y coordinamënt di sorvisc turistics; desvalis.

I damanadus/Les damanadësses dess avëi chëstes precondiziuns:

– Stüde de economia, de iurisprudënza o na laurea dla medema sort;

– Esperiënza tl turism, respetivamënter formaziun ajuntiva;

– De bones conescënzes dl laur söl PC y esperiënza cun i programs MS-Office y ince new media;

– Dër de bones conescënzes di lingac talian, todësc y inglesc, savëi le ladin é de ütl;

– Desponibilité de n gran impëgn y dediziun sciöche ince autonomia tl laur;

– Competënzes soziales y profescionales.

Les domandes po gni menades a jobs@altabadia.org