Sajun bele ruvada, scebëgn che i implanc resta ciamó n mëis daverc

Elmar Burchia
FacebookTwitterLinkedInWhatsAppEmail

Co éla pa jűda la sajun turistica da d’isté? “Damì co ci che an minâ” dij tröc hoteliers, che impò stlujará les portes cun i 13 de setëmber. La gaujia? “Al ne convëgn nia tignì davert”.

Le problem dla malsegurté atuala liada al Coronavirus, di sciori americans, rusc y dal Asia che mancia, ajache chisc ne pó nia ruvé adalerch, y dl personal che mëss impò garantì le sorvisc tles strotöres de cater y cin stëres, á fat to la dezijun a tröc patruns de stlű denant. N valgűgn gragn hotì á saré bele l’edema passada. “Al ne convëgn nia tignì davert inant” nes á dit n ostì da San Ciascian. Mo impò: sce dan la crisa s’éa i operadus turistics stes con trica, agost ciara fora bun por ci che reverda i numeri. Chi definitifs n’é nia ciamó dan man, mo le gran trafich de auti sön strada y les porciuns de sciori sön munt en Santa Maria dal Ciűf, Ferragosto, é n sëgn che dá confort. Bun á lauré chësc isté soradüt les üties da munt, por n valgünes é sta i ultims 30 dis cinamai damì co l’ann passé – giulan ai tröc ghesć dantadöt dla Talia, mo ince da stac vijins.

Implanc daverc, te paisc dűt stlűt

Y setëmber, otober, l’isté dles vedles? La speranza atira do le lockdown fo a vigni moda da tignì davert les strotöres fina mez otober. Gnüda éla atramënter: sce la sajun da d’invern s’é stlűta n mëis denant, saral insciö ince por chëla da d’isté – mancia pö dantadöt le tliënt talian cun le scomenciamënt dles scores. Te vigni caje – dij na inrescida de Coldiretti y Ixé – zirca 8,8 miliuns de taliagn (-18% respet al 2019) ò impò pié ia por val dis de vacanza tl mëis de setëmber. “Le mer resta inant la destinaziun plö chirida, ince sce la munt y la gastronomia vëgn tres plö damaná dai ghesć” scri Coldiretti. Ince forsc por chësta rajun restará i implanc portamunt n funziun: tl raiun dl Dolomiti Superski cina feter ala fin de setëmber.

L’isté da récord dl Alta Badia (l ann passé)

Sce an ciara zoruch, fô l’isté 2019 (indô n iade) sté da record, cun aumënc ince gragn por vigni assoziaziun turistica badiota: plö 4,6% de presënzes turistiches (205.566) respet al ann denant y 969.398 pernotamënc (+3%). Na cossa é feter sigűda: chësc isté ne sará nia na sajun alingrana por ci che reverda les gnüdes turistiches y nöts ti raiuns dla Ladinia.

Invern cun crüzies

Sëgn ciara dűc al invern. Y al é crüzies ch’al vëgnes indo na situazion desplajora. Tröpes cosses se mudará dassën: sön les pistes; söi lifc y dan i lifc; cun le après-ski; cun les manifestaziuns. “Les prenotaziuns por dezëmber stënta dër da gni” nes dij na ostira da La Ila. “La jënt aspeta, ó odëi sciöche ala va inant cun la pandemia”. Sce d’isté se damâ le scior na vacanza tla natöra, alaleria, tl sëgn dl chît, dla pesc y dla destanza, messará i operadus garantì por le invern 2020-21 particolarités nia saurides da mantignì.

Tla foto sönsom: la gran coda de jënt sön Piz Boé, tl grup dl Sela, a mez agost. Les imajes dles Dolomites plënes de sciori – tröc iadi sënza respeté le destanziamënt – à provoché polemiches y è deventades “virales” söi social. 

Scrite ite tl canal Telegram!  👉🏻  https://t.me/altoadigeinnovazione

Sun ince sön Facebook 👉🏻  https://www.facebook.com/altoadigeinnovazione

Y Linkedin 👉🏻  https://www.linkedin.com/company/alto-adige-innovazione

Ti potrebbe interessare