Al manacia da raité jö material: laurs sön la strada dla Val Badia

La Junta provinziala á aprové n proiet por la metüda en segurëza de n ërt do le pröm tunel sön la statala dla Val Badia, al km 5 + 050 rovan da Bornech. L’investimënt è de passa 730.000 euro

Antergní atira por mëte en segurëza n ërt tles vijinanzes de un di tuní sön la statala dla Val Badia tl Comun de San Laurënz: chësc é l’obietif de n proiet elaboré dala Repartiziun Infrastrotöres dla Provinzia. La Junta á aprové la delibera che reverda le proiet por le smendrimënt dl pericul dla tomada de peres dlungia la galaria artifiziala “G1” sön la statala dla Val Badia.

Intervënt de prescia

L’assessur por la mobilité, Daniel Alfreider, sotlignëia che la strada statala dla Val Badia é l’arteria de coliamënt prinzipala dla Val Badia cun la Val de Puster. “Cun chësc proiet gnarál aumenté la segurëza stradala y metü en segurëza la pert dl ërt interessada dal intervënt”. Le toch dl ërt che gnará metü en segurëza é püch dan l’entrada tl secundo tunel gnon da Bornech cuntra la Val Badia. Le diretur dla Repartiziun Infrastrotöres, Valentino Pagani, spliga che l’intervënt de prescia é nezesciar ince deache “la situaziun dl ërt vëgn monitorada da de plü agn y tl mëis de lugio á le maltëmp porté a na smöia cun material che é pié ia propi sön la pert dlungia le tunel y al é rové val’ material ince sön strada”. Al é spo sté nezesciar da saré la strada por de plü dis.

Le mür esistënt gnará alzé cun n mür de petun armé

Le toch de strada dan le secundo tunel dla strada dla Val Badia rovan da Bornech vëgn metü en segurëza.

Le proiet prevëiga l’ampliamënt dl mür atual cun n mür plü sterch cun ancoraje y cun de gran peres y n’armatöra de aciá. Implü él preodü n renforzamënt cun na rëi de metal, le tai dles plantes y la dortoraziun dl ërt. Por chësc investimënt él preodü indöt 731.300 euro. Dötaurela él le Sorvisc Strades che fej laurs de prescia por garantí la metüda en segurëza dla viabilité tres le consolidamënt dl ërt, de plü drenaji y la racoiüda dles eghes sura tera.

Scrite ite tl canal Telegram!  👉🏻  https://t.me/altoadigeinnovazione

Sun ince sön Facebook 👉🏻  https://www.facebook.com/altoadigeinnovazione

Y Linkedin 👉🏻  https://www.linkedin.com/company/alto-adige-innovazione