Coronavirus: bindebó de sotissura por les gares tla Ladinia

Le comitê tecnich dla FIS – la federaziun internazionala di sports invernai – á metű jö le calënder dles gares de Copa dl Monn por la sajun 2020/2021 che gnará aprové definitivamënter te na reuniun ai 3 de otober. Mudaziuns él preodű ince por l’Alta Badia: do cin ediziuns toma demez le paralel de nöt.

Indöt 39 gares di ëi y 35 dles ëles: chisc dis él gnű adűm le comitê tecnich dla FIS (presënc ince Markus Waldner y Peter Gerdol) che á ilustré les novitês por la proscima sajun dai schi. Mudamënc importanc él ince por ci che reverda les döes gares de Copa dl Monn söla Gran Risa. En chësc ann ne saral nia plö le slalom paralel, porater scialdi critiché ti agn passá da en valgögn atlec. Impede la gara dl lönesc sëra sot i refleturs él preodű n slalom ia por le dé ai 21 de dezëmber. Deperpo, romagn le tradizional gigant di ëi, en program la domënia ai 20 de dezëmber. L’ultim iade che La Ila á ospité n slalom fô tl 2011.

Publich limité

Chëstes n’é nia les sores gares tla Ladinia, deache bele ai 18 y 19 de dezëmber 2020 él söl program les gares classiches de Super G y discesa di ëi te Gherdëna, deperpo che ai 26 de jená 2021 se sposta le carussel di schi a Al Plan de Mareo cun na gara de slalom lerch. Dan trëntcinch agn, dl 1985, â döt metü man, cun la pröma gara de Copa dl Monn söla Gran Risa y la bela devënta de Ingemar Stenmark. Do les prömes trëi ediziuns, ê le numer di sciori radoplé y ti agn á miliuns de spetadus da döt le monn odü les gares dl’Alta Badia tla televijiun. Chësc iade – gauja coronavirus – sarál dűt en pű’ atramënter. Sce Sölden (ai 17 y 18 de otober) sará a “portes stűtes” (zënza publich, zënza festes y zënza vigni sort de momënc de plajëis), a Sëlva y a La Ila sarál chëst ann l’azes ala zona dl travert reservé ma a pűc tifusc. I detais n’é nia ciamó gnűs stlaris.

Crűzi ince por les gares te Gherdëina

Les gares te Gherdëina é dagnëra en gran spetacul por le publich. (ph: saslong.org)

Crűzi él ince tl comitê dla Saslong Classic Club cun le presidënt Rainer Senoner che cunta de “avëi albű bele agn plö lisiers”. “Chësc iade n’él nia saurì da organisé les gares. Nos orun porchël lauré ciamó deplö adűm al’Alta Badia, ajache chëstes manifestaziuns sportives é da spavënt importantes por dűt Sűdtirol, por l’economia y por le turism”. Senoner spera che por les gares de dezëmber sides poscibl avëi ince le publich. “I vëighi segnai positifs che vëgn dal’Austria, olache al vëgn bele ince soghé a palé ti stadiums dan ai tifusc”. Le problem plö gran resta chël finanziar: te Gherdëina fejun i cunc cun en manco 60-70 porcënt de chertes d’entrada venűdes respet ai agn passá y cun cosc implű de 300.000-400.000 euro.

“Ciarun de te”, ince d’invern

“We care about you” é le slogan cun chël che l’Alta Badia se presënta al scior chësc invern. (ph: Alex Moling)

Intratan se fejun bele val pinsier por la sajun da d’invern. Cun en comunicat ai media ó Alta Badia Brand (ABB) assiguré che ara vá da fá turism ince cun les restriziuns cuntra le coronavirus – sciöche al é sté ti mëisc da d’isté. La sajun – sce döt va bun y al ne vëgn nia en secundo lockdown pormez – mët man ai 5 de dezëmber. “We care about you” (ciarun de te) é le slogan cun chël che i sis paisc dl Alta se presënta al scior por la sajun blancia. Les regoles romagnará feter les medemes: le dovëi da se vistì le mascherot (ti punc de venűda dl schipas; tl areal dan i implanc portamunt; tl jì ite y tl gnì fora dai lifc; tratan le iade; tl jì ite y tl gnì fora dai restoranc, imprëstaschi, botëghes, bars; tl schibus y te vigni sit olache al é tröpa jënt). Impó podará sön ti lifc y tles cabines senté sö le numer plëgn de porsones (na regula che atualmënter vel por dűt Sűdtirol). A numer stlűt (cun prenotaziun) sará ince les manifestaziuns organisades dai ufizi dl turism. Da odëi restel ci che suzedará cun i après ski: dűt depënn dal’evoluziun dla pandemia da Covid-19 fora por l’altonn.

Scrite ite tl canal Telegram!  👉🏻  https://t.me/altoadigeinnovazione

Sun ince sön Facebook 👉🏻  https://www.facebook.com/altoadigeinnovazione

Y Linkedin 👉🏻  https://www.linkedin.com/company/alto-adige-innovazione