Maratona y Bike Days 2021: al é na data, mo le risch é che düt tomes (danü) te ega
Ti ultims dis él gnü comuniché les dates por i evënc dla roda de chësc isté tl Alta Badia: la Maratona dles Dolomites, desdita l’ann passé por gauja dl coronavirus, é söl program la dumënia ai 4 de lugio; le Dolomites Bike Day gnará tigní ai 19 de jügn. Le Sellaronda Bike Day é preodü por i 27 de jügn y i 18 de setëmber. Cun la situaziun ciamó dër malsigüda, él ri da preodëi sce les manifestaziuns – che chërda adarlerch milesc de apascioná – gnará efetivamënter a s’l dé. Les manaces plö granes: les variantes dl virus y le serum (nia por düc).
I gran evënc dla roda 2021
Al fô la fin de merz dl ann passé canche le comité dla Maratona dles Dolomites é ste sforzé da desdí öna dles manifestaziuns dla roda plü aprijades dl monn: “Al n’é nia le momënt da fá festa” le comunicat. La Maratona nr. 34 ê preodüda por la domënia ai 5 de messé 2020, dedicada al tema dl’ert, mo ara n’é nia gnüda fata – massa alt le risch dl virus. N ann él passé y i laurs ne s’á nia archité. Te n comunicat mené fora i ultims dis da Alta Badia Brand, vëgnel definí ofizialmënter les dates di gran evënc dla roda.
Maratona 34: tröpes les domandes, nia ciamó de sigü
Por la Maratona saral da odëi sce düc podará rové adarlerch. Y sce l’evënt podará gni organisé. Ai scric ite che á bele regolarisé por le 2020 ti él gnü garantí che ai podará garejé por le 2021 (i detais él da ciafé sön le sít.maratona.it) Les regoles por la segurëza sará al pröm post mo püch podaran fa sce le serum cuntra le virus dla Covid-19 (y de sües variantes) ne sará nia ciamó desponibl por chëla data. Val zifra: les doses de serum tla Talia partides fora cina sëgn é de zirca 4,3 miliuns (sön na popolaziun de passa 60 miliuns). Mo al sará ri che anter la fin dl isté le mez dla popolaziun taliana ciafes na dosa. Podará pa i ziclisc (passa 9000) tó pert ala gara ma sce ai é vaziná? Y i acompagnadus, podará chi rové adarlerch? Ci n’él pa cun i cënc de volontars? Les domandes é tröpes.
“Da sëgn a lugio pó se mudé döt”
Dal comité dla Maratona esun otimisc, ince sce al vëgn studié vigni scenar. “Laurun sciöche vigni ann, ajache por organisé n te’ evënt él debojëgn de 360 dis de laur danfora” dij le comité. “Ince sce dal America, dal Australia o dala Nuova Zelanda él desdites, é l’interes da pert di tour operator dal Inghiltera y dal Europa dër gran; por chël che reverda i protocoi de segurëza él ciamó da aspeté: da sëgn a lugio pó se mudé döt”. Val’ resposta gnará impormó do Pasca.
La novité: n secundo Sellaronda Bike Day
Val’ edema denant, la sabeda ai 19 de jügn saral spo le Dolomites Bike Day, la cuarta ediziun dla manifestaziun dles rodes nia competitiva che ti pormët ai apascioná da se gode i jus y les strades zënza auti. Feter 51 km sön ju de Ciaulunch, jö Reba, La Pli de Fodom, ju de Falzares, ju de Valparora, San Ciascian, La Ila y Corvara. La novité de chësc isté sará n secundo apuntamënt cun le Sellaronda Bike Day: la domënia ai 27 de jügn y spo la sabeda ai 18 de setëmber.
Elmar Burchia
